Ni Alfonso T. Ruda
*POLANCO, Z.N. (PEBRERO 22)— *Malampusong gisaulog kagahapon(Pebrero 21) sa Purok Bayabas Farmer’s Association ang ilang unang tuig nga anibersaryo.
Sa gipahigayong programa, gipasalig ni Polanco Municipal Agriculturist G. Edgar Agayan sa 29 ka membrong-mag-uuma sa maong asosasyon ang kaandam sa iyang buhatan nga molugway ug suporta aron sa mga mag-uuma.
Gipasidan-an usab ni Rommer Ladera ang mga mag-uuma sa gawasnong pagsulod dinhi sa nasod sa bugas=humay gikan sa laing nasod gumikan sa Rice Tariffication Law nga bag-o lang nahimong balaod. Alayon niini giawhag niya ang mga mag-uuma nga mangandam na sa pagtanom ug mga utanon, prutas ug uban pang mga lagutmon, gawas sa humay ug mais.
Si Vice Mayor Alfredo Bait-it sa iyang bahin, miangkon sa kapakyas sa Sangguniang Bayan sa Polanco pagpasar ug ordinansa nga makapalambo sa kinabuhi sa mga mag-uuma tungod sa dili pagkahiusa ug kakulang sa suporta gikan sa ilang mga kauban sa konseho. Dungan niini, gi hangyo niya ang mga taga-Silawe nga hatagan ug pillion ug ang maglangkob sa sunod nga konseho.
Gisaad ug gipasalig ni Mayor Evan Hope D. Olvis ang padayon ug makanunayong suporta sa iyang administrasyon sa mga mag-uuma sama sa paghatag libreng binhi sa humay ug mais ngadto sa mga mag-uuma.
Gawas niini, gipahibalo usab sa alkalde ang paggahin ug dugang pondo para sa agrikultura karong tuig 2019. Sumala pa sa alkalde, tipik niini, gamiton sa mga technician aron kanunayng mabisita ang mga mag-uuma ug mahatagan sila ug tukmang suporta . Ang munisipyo molugway usab ug pahulam para sa abono nga kinahanglanon sa mga mag-uuma. Amo kining himoon aron duna usay mapahulam sa ubang mga mag-uuma nga nagkinahanglan ug abo,” matod pa ni Mayor Olvis.
Gipasalig usab sa Mayor nga bukas kanunay ang iyang buhatan aron paminawon ang yangongo sa mga mag-uuma ug tubagon ang ilang mga panginahanglan. Iya usab nga gipasabot nga nagkinahanglan gyud ug panahon ang pagpagawas sa pondo sanglit magsubay man kini sa tukmang proseso nga gitakda sa atong gobyerno. (ATR)
