Unang misa de gallo, gidagsa

Pagadian City – Gidagsa sa katawhan ang Sto. Nino Cathedral sa Brgy. San Francisco atol sa unang kadlawon sa misa novena kabahin sa pagsugat sa pagkatawo sa Ginoo.

Alas 3:00 pa lang kaganinang kadlawon walay puas ang pagbaha sa mga deboto sa simbahan aron tambungan ang unang Misa de Gallo sa unang adlaw sa simbang gabi.

Pag-abot sa alas 4:30 ganinang kadlawon padayon ang pag-abot-abot sa mga tawo hangtud ang uban nag-alirong na lamang sa gawas sa palibot sa Cathedral tungod sa kapuno sa sulod mismo sa simbahan alang sa una nga Misa de Gallo.


Si Most Rev. Ronald Lunas, ang Obispo sa Diocese sa Pagadian ang nidumala sa unang santos nga misa kaganihang kadlawon.

Gipahinumdum sa Obispo ang kamahinungdanon sa buhat nga maoy kinabuhi sa pagtoo lakip nga gi-ampo ni Bishop Lunas ang mga lugar nga apektado sa kalamidad nga linog.

Sa interview sa RMN Pagadian sa pipila ka manimbahay nga ang simbang gabi kahigayonan nga makapangayo sa Ginoong Hesus og maayo nga panglawas alang sa iyang pamilya butang nga nahitabo pod kuno.

Nahimong malinawon ang unang salbo sa simbang gabi ug gani walay natala ang Pagadian City PNP nga panghitabo nga makabalda sa kasaulugan.

Facebook Comments