Sarangani Province—Gisugat dayon og nindot nga mga kaayuhan ang unang quarter sa tuig 2018 sa Sarangani Province. Isip paglab-as sa mga nahitabo sa atong Year-End Review, nahimong produktibo ang nakalabay nga mga bulan sa Enero, Pebrero og Marso ilalum sa Sulong Sarangani flagship program ni Governor Steve Chiongbian Solon, katugbang ang suporta nila Senador Manny Pacquiao, Congressman Ruel Pacquiao, mga kaubanang local officials, og ni Pangulong Rodrigo Duterte.
Imbukada pa lang sa tuig, ang Sulong Imprastraktura na ang nagbansiwag. Gi-groundbreaking sa Chinese Government og DOH ang Regional Drug Rehabilitation Center sa Kawas, Alabel may pondo nga P350 Milyones ka pesos. Gisugdan pud pagpatukod ang Regional Sports Complex sulod sa Kapitolyo sa Sarangani adunay pasiunang pondo nga P200 Milyones ka pesos, og ang opisina sa Bureau of Fisheries and Aquatic Resources (BFAR) balor og P5 Milyones ka pesos. Ang bag-ong fishport complex sa Kiamba ang na-turn over na nikantidad og P18 Milyones ka pesos.
Natagaan pud dayon og bag-ong high-end patrol car lakip na mga armas og mga special equipment ang PNP Sarangani atol sa pagbisita sa bag-ong PNP Chief Director General Oscar Albayalde, human usab nahimong Guest of Honor and Speaker si Governor Solon sa PNP Region 12 Anniversary.
Og sa unang higayon atong Marso, nibisita sa Sarangani Province ang common-law wife ni Pangulong Duterte nga si Honeylet Avanceña dala ang mga maayong pagtulun-an og inspirasyon ngadto sa mga kabataan og kababaihan. Gisugat sya mismo nila Governor Solon og former governor Migs Dominguez sa iyang gisakyan nga helicopter gikan sa dakbayan sa Davao.
