Davao City – Gikumpirma sa Department of Health 11 nga usa na ang namatay sa sakit nga tipdas karon nga bulan.
Kini ang gitug-an ni DOH 11 Director Annabelle Yumang nga usa ka uno anyos nga bata nga taga Tibungco ang nataptan og sakit nga tipdas ug namatay samtang gitambalan sa Southern Philippines Medical Center.
Giingon ni Dr.Yumang nga wala mabakunahi nga pangontra sa tipdas ang bata rason mihugno ang immune system niini hinungdan sa kamatayon.
Sa rehiyon onse anaa na sa 55 ka kaso sa tipdas ang natala sa diin ang siyudad sa Dabaw nakatala og pinakdaghang kaso human miabot sa 32 itandi sa miaging tuig.
Ang pinakabata nga natakbuyan nag-edad og uno anyos ug ang pinakatigulang nag-edad og 65 anyos ug sagad kanila gikan sa upat ka barangay sa ikaduhang distrito ning dakbayan.
Hinoon, sagad kanila naayo na human madapatan og tambal.
Gidasig ni DOH-XI Director Yumang ang mga ginikanan nga ipabakuna ang ilang mga anak aron makasukol ang ilang immune system sa virus nga nagdala og sakit nga tipdas.
Kahinumduman, nag-epidemic sa sakit nga tipdas ang national capital region human miabot og 52 ang namatay sa nasangpit nga balatian.
Samtang mikuyanap sab ang tipdas sa ubang bahin sa Luzon, Western ug Eastern Visayas diin ang Cagayan de Oro City nakatala na og 3 ka casualty sa maong balatian.
RadyoMaN Joel Viray
