Davao City – Giklaro karon sa PhilHealth nga covered niini ang sakit nga tipdas kun measles.
Kini ang gibutyag ni Kleah Dublin-Guevarra sa PhilHealth Davao atol sa interview kaniya ni RadyoMaN Misel Miral-Galve sa tulumanong Serbisyong Straight to the Point human nga daghan ang naalarma gumikan sa outbreak sa maong sakit sa Luzon area.
Sumala ni Guevarra nga sa maong package adunay standard amount nga ma-avail kun mabawas sa ospital bills ngadto sa mga pasyenteng nagkatipdas nga mao ang 7, 700 pesos.
Dugang pagpaklaro niini nga ang maong nasangpit nga kantidad alang kadto sa tipdas nga walay komplikasyon apan aduna usab laing package alang sa tipdas nga dunay komplikasyon sama sa measles nga dunay pneumonia diin aduna kini 15, 000 pesos nga makuha sa PhilHealth ingon man sa ubang komplikasyon depende sa diagnosis sa doktor.
Matud pa nga kinahanglan lang segurohon nga nakabayad sa premium contribution.
Gani wala usab angay ikabalaka ang mga ginikanang adunay mga gagmayng anak nga nagkatipdas apan wala nalista isip dependents sa ilang membership gumikan mamahimo lang ipasa ang birth certificate niin ayha madischarge sa ospital mapa public man o private aron maka-avail sa benepisyo sa insurance.
RadyoMaN Renz Barbarona
