Davao City – Gi-akusahan karon sa usa ka drug pusher nga giplantiran kini og daghang sachet nga shabu sa mga operatiba sa Buhangin PNP atol sa pagronda kaganinang kadlawon.
Sumala ni Christopher Elisan, 42 anyos, minyo, welder, ug nanimuyo sa Purok 12 Brgy. Communal, distrito sa Buhangin ning siyudad, gitamnan kini og mga ebidensiya sa mga pulis nga mihaloghog sa iyang balay 2:45 ganinang kadlawon.
Nanghimakak si Elisan nga drug pusher kini ni dili kuno siya gagamitan og droga taliwala sa 13 ka sachet sa shabu nga nakumpiska gikan sa iyang possession.
Apan hugot gipangulipas ni Chief Inspector Jack Tilcag, hepe sa Buhangin PNP, ang pasangil ni Elisan ug gani halos usa ka buwan nga ilang gipailawom sa surveillance ang suspek.
Sigun ni Tilcag nga usa sa kamatooran nga dili planted ang nakuha nga mga shabu mikuha sila og search warrant sa korte aron masusi ang panimay ni Elisan.
Hinoon daling gitin-aw sa opisyal nga dili high value target ni lakip sa ilang drug watch list ang dinakpan.
Kalapasan sa Republic Act 9165 kun Comprehensive Dangerous Drugs Act of 2002 ang ipasaka nga asunto batok sa suspek samtang temporaryo kini napaslak sa selda sa Buhangin PNP.
RadyoMan Joel Viray
