Pormal na nga ginlunsar sa probinsya sang South Cotabato ang Universal Healthcare Program ukon UHC kadungan sa ginpatigayon nga 2019 Provincial Health Summit kahapon nga adlaw.
Ang South Cotabato ang isa sa 33 ka mga probinsya sa pungsod nga mangin integration site sang implementation sang amo nga programa.
Suno kay Dr. Fatima Emban, assistant regional director sang DOH 12 nga ang UHC ang isa sa pinakaimportante nga laye nga napasar para sa ikaayong lawas sang mga pumuluyo kag mapalaron ang probinsya sang South Cotabato nga napili nga mangin isa sa integration site.
Pinakaimportante suno pa sa nasambit nga programa ang automatic coverage sang tanan nga mga pumuluyo sa National Health Insurance Program ukon NHIP kag pooling of funds paagi sa special health funds sang probinsya.
Ginhatagan pa punto ni Dr. Emban nga kon anuman ang resulta sang implementasyon sang Universal Health Care sa mga integration site mangin basehan ini agud makita kon ano nga approaches ang sundon sa implementasyon sang programa sa bug-os nga pungsod.
