Sarangani Province–Malipayon karon nga gibalita sa Provincial Government sa Sarangani nga nakatakda ang libreng pagpang-opera sa Sarangani Province sa sikat og inila nga medical team sa tibuok Pilipinas nga mao ang UST MMI kon University of Santo Tomas Medical Mission, Incorporated.
Segun ni Ms. Asma Akmad, program manager sa Serbisyong Sarangan Community Outreach program ilalum sa buhatan ni Governor Steve Chiongbian Solon, mahitabo ang Grand Medical and Surgical Mission sa UST sa Hunyo 4 paingon Hunyo 9 sunod tuig 2019, lima (5) ka-adlaw, kaabag ang dakong pag-ayuda sa medical team sa General Santos Doctors Hospital, Provincial Health Office, mga Municipal Health Office, og ang mga municipal hospital sa Sarangani.
Pwedeng ma-operahan kadtong adunay cyst, mayoma, katarata, tumor, danlak, almuranas, goiter, og uban pang kaso sa minor og major surgery. Mahitabo ang pagpang-opera sulod mismo sa Sarangani Provincial Hospital.
Aron dili na malisdan sa paglakat-lakat og pamelete ang mga pasyente, matigayon ang prescreening sa matag munisipyo sa Sarangani. Gani nahuman na niaging Disyembre 11 ang pag-screening sa mga nagpalista nga taga-lungsod sa Malungon. Sa bulan sa Enero sunod tuig ang screening usab sa mga taga-Maitum, Kiamba, Maasim, Alabel, Malapatan og Glan. Giawhag ang tanan nga buot magpa-opera nga muadto na sa ilang mga barangay health workers o dili ba kaha sa mga health centers sa Sarangani Province aron magiyahan sa mga angay nga buhaton una pa ang prescreening period.
