Davao City – Gipasabot sa Philippine Dental Association – Davao City Dental Chapter ngadto sa publiko ang nagapadayon nilang kampanya bahin sa dili rehistradong clinic, dentista, sanitation ug uban pa.
Sa pakighinabi kang Dra. Rochelle Salinas, Former President ug kasamtangang Board of Director PDA – Davao City Dental Chapter atol sa tulumanong Serbisyong Straight to the point, gitataw niini nga kinahanglan mahibal-an sa katawhan nga adunay naga-operate nga mga clinics sa Davao nga walay rehistro ug adunay mga dili lisensyado nga ubang mga dentista.
Sumala ni Salinas nga ang dili saktong pamaagi sa pagtunol og serbisyo sa ngipon posibleng hinungdan sa pagtapot sa mga sakit sama sa HIV, Tuberculosis ug Hepatitis gikan sa usa ka pasyente ngadto sa laing pasyente pinaagi sa injection diin asa makuha ang dugo.
Busa nagpadayon ang ilang proyekto karon bahin sa pagdikit og mga stickers ngadto sa mga dental clinics diin kini nagpasabot nga pasado kini sa PDA.
Matud pa nga responsibilidad sa mga medical practitioners nga huna-hunaon ang public safety sa ilang mga pasyente ug aduna usab responsibilidad ang matag pasyente nga sutaon ang mga ginaadtuang clinics og nagasunod ba kini sa mga sumabanan.
Pahimangno karon sa PDA nga i-report kanila og adunay mga nahibal-an nga mga unregistered clinics, unlicensed dentists ug uban pa.
Sa pikas bahin, nagpahinumdom usab ang maong asosayon sa upat ka core values sa dentistry nga mao ang pag toothbrush 2 times a day, mugamit og toothpaste nga adunay fluoride, limitahan ang pagkaon og mga tam-is nga pagkaon ug mubisita sa dentista matag unom ka bulan.
RadyoMaN Renz Barbarona
