Unom ka balay ang apektado sa sunog sa Zone 10, Impantao, Barangay Bulua ning syudad karong buntag.
Tulo ka balay ang totally damaged samtang tulo usab ang partially damaged.
Matud ni SFO3 Samson Villarde sa Bureau of Fire Protection kon BFP nadawat nila ang tawag alas 8:46, gideklarang second alarm alas 9:50, undercontrol-alas 9:54 ug na fire out-alas 10:05 karong buntag.
Dugang pa ni SFO3 Villarde nga mokabat sa 200 mil pesos ang damyos sa maong sunog.
Samtang naglisod ang Bureau of Fire Protection kon BFP sa pagpalong sa kalayo sa Zone 10- Impantao Barangay Bulua ning syudad.
Kini tungod kay walay fire hydrant sa area hinungdan nga kung kinsa ang fire truck nga moabot, tubil tubil na lang ang pamaagi.
Nasayran nga mokabat sa walo ngadto na sa napulo ka fire truck ang nakaresponde sa area, apil na niini ang mga volunteer fire brigade.
Sa karon padayon pa ang imbestigasyon sa BFP kung unsay hinungdan sa nasangpit nga sunog.
