6 na an Person’s Under Investigation o PUI sa Coronavirus 19 na tag-admit sa Caraga Regional Hospital sa Surigao City. Ini base sa pagkumpirmar nan OIC na si Dr. Cheryl Gotinga.
An nadugang an isa ka 63 anyos na babaji, diabetic ug hypertensive, lumad na taga-Butuan City ug may pagbiyahe gikan sa Manila. Hinoon tagpaklaro na tagkuhaan na ini nan swab sampling ug nagpaabot nan resulta gikan sa kaulohan.
An PUI waya nagpasabot na positibo na sa COVID19 kundili nagpaabot pa sa resulta sa test kon positive o negative. An una na tag-admit sa CRH isip PUI, isa ka 67 anyos, babaji gikan Siargao, nobiyahe sa Manila, ikaduha na PUI, 62 anyos na babaji gikan Surigao City, may biyahe gikan Manila, ikatuyo na PUI, 38 anyos na layaki gikan Cabadbaran City, nobiyahe sa Hongkong, ikaupat na PUI, isa ka tuig pa na bata, babaji, lumad na taga-Butuan City, nobiyahe sa Manila ug an ikalima na PUI, isa ka 71 anyos na babaji, taga-Surigao City ug nobiyahe sa Manila. Bisan kon dili taga-Surigao an iban na PUI, sa CRH ini i-admit labi na kay sa DOH guidelines ug protocol sa mga kaso sa COVID19 an Caraga Regional Hospital nan Surigao City ug Adela Sierra Ty Hospital ra sa Tandag City an duha ka Govt Referral Hospital. ( RadyoMaN Jojo Ferol)
