Upat ka libong raliyesta, mosalmot sa lihok protesta karong adlawa

35

Gibana-banang moabot sa upat ka libo ka mga raliyesta lakip niini mga mag-uuma, kabatan-onan ug mga lumad ang mosalmot sa himoong lihok protesta karong adlawa dinhi sa Cagayan de Oro ug Bukidnon.

 

Kini ang gibutyag ni Kalumbay Chairperson Datu Jomorito Goaynon sa interview sa dxCC-RMN Cagayan de Oro.


 

Matud ni Datu Goaynon nga usa ka libo niini ang gilaumang mosalmot sa lihok protesta dinhi sa Cagayan de Oro ug ang tulo ka libo ang gilaumang mosalmot sa protesta sa Valencia City, Bukidnon.

 

Dinhi sa Cagayan de Oro mga alas nuybe karong buntag nakatakdang magtapok ang Kalumbay Lumad Organization, Kilusang Mayo Uno, Anak Bayan, Kadamay ug uban pang grupo sa capitol grounds ug magmartsa paingon sa Divisoria area diin himoon ang pormal nga programa.

 

Matud ni Datu Goaynon nga gusto nilang ipaabot sa gobyerno ang ilang panawagan nga hunungon na ang Martial Law sa Mindanao.

 

Lakip usab sa ipanawagan karong adlawa nga hunungon na ang pagpasurrender ug pagpasaka sa mga hinimo lamang nga kaso, ihunong ang militarisasyon sa komunidad nga maoy hinungdan sa pagbakwit ug labaw sa tanan hatagan og hustisya ang tanang mga biktima sa paglapas sa tawhanong katungod.

 

Ang protesta himoon dungan sa paghandum sa pagdeklara ni kanhi Presidente Ferdinand Marcos sa martial law niadtong Septembre 21, 1972.




Facebook Comments