Upat ka magsoon ang namatay sa sunog sa Barangay Poblacion, Mahinog, Camiguin mga alas 3:40 kaganihang kadlawon.
Kini ang gikumpirma ni SFO1 Renato Fabillore, imbestigador sa Mahinog Bureau of Fire Protection sa interview sa dxCC-RMN.
Matud ni SFO1 Fabillore nga ang mga biktima puros mga senior citizens nga silang Angelita Lao, 74 anyos, Tomasita Lao, 70 anyos, James Lao, 65 anyos ug Virgilio Lao, 64 anyos.
Samaran sa maong sunog si Lorna Jaquelmac, 65 anyos, silingan sa biktima ug maoy nag-atiman sa paralisadong biktimang si Tomasita Lao.
Luwas usab sa sunog ang duha ka mga menor de edad human unang napagawas ni Jaquelmac sa dihang namatikdan ang sunog.
Gibutyag ni SFO1 Fabillore nga posibling problema sa electrical installation ang hinungdan sa sunog nga dunay bana-banang damyos nga usa ka milyon ka pesos.
