Wala nay nahimo ang usa ka pamilya, apan dawaton ang pagkamatay sa upat nila ka miyembro, human madisgrasya ang gisakyang motorsiklo, pasado ala-una sa udto niadtong Pebrero 7, samtang mobakwit unta tungod sa kahadlok nga atakehon, matud pa, sa mga armado ang ilang lugar, sa Barangay Malingao, sa lungsod sa Tubod, Lanao del Norte.
Danguyngoy ang naabtan sa mga reporter kang Romeo Obedencio, bana sa namatay’ng si Jenalyn Bermejo, 27 anyos, tungod sa gibating kasakit sa nahitabo nga lakip ang ilang mga anak nga kwatro ug otso anyos ang naangin.
Base sa police report sa Tubod Municipal Police Station, nahitabo ang aksidente sa may Barangay San Antonio, pipila ka kilometro gikan sa Malingao, dihang mo-overtake unta ang gisakyan sa mga biktima sa may blind curve nga bahin sa dapit, apan mibangga sa natagbong dump truck.
Wala na maka-menor ang driver sa dump truck tungod kay lugsongon ang maong dapit, samtang nawad-an usa sa iyang control ang driver sa motor nga pag-umangkon ra usab sa biktimang si Jenalyn.
Lakip nga namatay ang inahan ni Jenalyn nga si Benida Bermejo. Ang driver nga si Johnny Bermejo, 18 anyos, nakaangkon og mga samad sa kalawasan, nagpaalim nalang karon sa tambalanan.
Miingon si Governor Imelda Dimaporo, gikasubo nila ang maong panghitabo tungod kay imbes gideklarang malinawon ug malampuson ang plebisito, dunay namatay usa ka adlaw human niini.
Mitunol na og tabang pinansiyal ang kagamhanang lokal sa Tubod aron mapahimutang ang mga namatay samtang ang probinsiyal nga kagamhanan maoy nag-atiman sa mga panteyon.
Gitakdang ilubong ang mga biktima sa Pebrero 16, sumad usab sa adlaw’ng natawhan ni Jenalyn. (RadyoMaN Divina M. Suson)
