Tampakan, South Cotabato–Gikumpirma ni Tampakan Mayor Jun-Jun Escobillo nga adunay upat ka mga purok sa Brgy. Lambayong sa maong lungsod ang gipa-ilalom sa lockdown human nga nagpositibo sa covid-19 ang pulis nga gikan sa Malalag, Davao Del Sur.
Saysay sa Mayor nga upat ka adlaw nga ni-uli sa Tampakan ang nasangpit nga Pulis ug gipa-ilalom sa PCR Test Apan nag-negatibo matud pa kini sa virus, tungod niini gitugutan nga magpahigayon ug home quarantine.
Apan dihang nibalik na kini sa Malalag, gipa-ilalom kini sa laing PCR Test ug adunay nakit-an, hinungdan nga gipa-ilalom sa swab test ug nagpositibo.
Dugang pamahayag ni Mayor Escobillo nga nagpahigayon na sila ug contact tracing kung asa anaa na sa walo kaadlaw nga naka-lockdown ang upat ka purok.
Higayon nga walay magpositibo sa mga direct contact sa nahisgutang pulis, ilaha ng ablihan ang maong mga purok.
Sa karon, gilaumang mapa-ilalom sa test ang kabanay niini human nga nakita-an ug sintomas ang lolo sa nasangpit nga pulis.
Kalabot niini, gibutyag ni Mayor Escobillo nga atol sa gihimong contact tracing sa pulis, nasayran nga mi-adto pa kini sa syudad sa Koronadal partikular na sa usa ka construction firm aron mamalit ug materyales alang sa iyahang balay.
Migawas usab nga aduna kini travel history sa kauluhan niadtong Hunyo 1 ngadto na 6 kung asa mikuha kini sa patrol vehicle sa Malalag Police Station.
Dako ang pagtuo ni Mayor Escobillo nga sa kauluhan nakuha sa nahisgutan ang maong virus.(LVR)
