Kasong Rape with Homicide ang gisang-at sa SITG Bragas batok sa upat ka suspek nga giila silang Dennis Panzan, Kent Lawrence Espinosa, Renato “Empoy” Bayansao ug laing usa ka John Doe kinsa at-large hangtod karon.
Matud ni Calinan PNP Chief of Police Major Neil Vistar nga ang duha ka testigo nga sila Alyas “Michael” ug “Joan” ang positibo nagtudlo sa upat ka mga suspek nga maoy mga sakay sa ombak nga color yellow nga gisakyan ni Architect Vlanche Marie Bragas sa kanto sa dalang Fausta bandang 10:00 gabii niadtong Mayo 16,2023.
Suma ni Vistar, nagtindog sa may bakeshop si Alyas Michael ug nakita niini ang mga nawong sa sakay sa bao-bao nga gisakyan ni Architect Bragas diin ang tattoo sa kamot ni Espinosa nakita sa maong testigo ug subay sa cartographic sketch mitugma ang dagway kang Espinosa kinsa missing hangtud human dagita sa tawong naka bonet nga nahitabo sa Barangay Lacson kapin semana na nakalabay.
Dugang ni Vistar, nakita sa ikaduhang testigo nga si “Joan”, si Dennis Panzan nga maoy misumbag sa nawong ug sa tiyan sa biktima dihang mikanaog na kini sa kanto sa Megaville kung asa pila nalang unta ka metros sa balay na sa dalaga.
Dugang sa testigo,nawad-an sa panimuot si Bragas tungod sa suntok ni Dennis ug dayon gisakay og balik sa ombak human nag-U turn ang maong bao bao paingon na sa crime scene partikular sa kasagingan sa Barangay Dacudao kung asa nakita ang patay’ng lawas sa biktima 6:00 sa buntag pagkabuntag niadtong Mayo 17,2023.
Dugang sa mga testigo, si Renato “Empoy” Bayansao maoy nag-drive sa ombak hangtod nahitabo ang brutal nga paglugos patay kang Bragas nianang gabhiona.
Ug gani, gisinggitan pa ni Dennis si Alyas Joan nga “padaplin” kay mabanggaan kini atol sa ilang pagsibat sa kanto sa Megaville kung asa nakita ang usa ka tsinelas nga gisuot ni Bragas ug nasayran ang testigo ug si Dennis magsilingan lang maong nakaila kini sa nasampit nga suspek.
Atol sa SITG BRAGAS Conference kagabii, gibutyag ni DCPO Director Police Col. Alberto Lupas nga dili pa nila masuta kon kinsa sa upat ang mastermind sa krimen diin giingon ni Major Vistar nga planado sa mga suspek ang paghimo sa krimen.
Kumbinsido si NBI XI Director Atty.Archie Albao nga nalambigit sa droga ang mga suspek kini human nasikop sa buy-bust operation ug nagpositibo sa drug test si Renato Bayansao kinsa anaa karon sa kustodiya sa PDEA XI.
Kumpiyansa si DCPO-Legal Officer Police Captain Atty.Lean Marquez nga lig-on ang ilang kaso tungod sa solidong mga ebidensya ug sa kredibilidad sa mga testigo sa krimen nga ilang gihawiran karon.
RadyoMaN Joel Viray
