[image: IFM 919 Logo (1).jpg]
Masub anon karon ang pasko sa usa ka pamilya human mitaliwan ang upat ka myembro tungod sa disgrasya sa dalan Dominggo sa hapon (December 23, 2018) sa provincial road sa Barangay Palkan, Polomolok, South Cotabato.
Ang mga nalambigit nga sakyanan sa nahisgutang aksidente mao ang L300 van gipanag iyahan sa Notre Dame Sienna College of Polomolok (Dominican Sisters) ug usa ka UV Express van.
Ang mga myembro sa pamilya nga namatay sa aksidente giilang sila Frederick Anciano 46, Maryjoy Anciano 30, Justine Anciano 8 ug Janine Anciano 2.
Ang pamilyang Anciano nakahimo pa og selfie oras bag o nahitabo ang aksidente sa lugar sa gibisita nilang paryente.
Nigawas sa imbestigasyon sa kapolisan nga paingon og Koronadal City ang duha ka mga sakyanan apan paspas matod pa ang padagan sa UV express van nga ni-overtake pa hinungdan sa disgrasya.
Gipang extricate pa sa mga rescuers ang naipit na mga pasahero sa van.
Gipangdala usab ang mga samarong biktima ngadto sa ospital sa Koronadal og General Santos.
Padayon usab karon ang imbestigasyon nga gihimo sa kapolisan kung kinsa ang sad an sa maong aksidente.
