Davao City – Wala nay kinabuhi ang usa ka pamilyahan sa Brgy. Tandik, Maragusan, Compostela Valley Province sa dihang narekober ang mga lawas niini tungod sa nahitabong landslide sa maong lugar.
Sa impormasyon gikan sa Office of Civil Defense kun OCD XI, gikumpirma niini nga upat ka miyembro sa pamilyang Magallanes ang namatay diin narekober ang mga patayng lawas niini alas 10 kagabii, Enero 14.
Giila ang maong mga namatay nga sila Ramon Magallanes, 29 anyos, Rowena Magallanes 32 anyos, Hazel Magallanes, 3 anyos ug Joey Magallanes, 1 year old, mga residente sa nasangpit nga lugar.
Sa pikas bahin, subay usab sa report sa OCD XI nga duna nay mga pamilya ang napabakwit sa pipila ka lugar sa Comval ug Davao Oriental tungod sa pag-ulan ug kadelikado sa landslide diin sa Nabunturan, 72 ka pamilya diin 269 kini ka mga indibidwal ang napabalhin samtang 1 usa usab ka pamilya sa Monkayo.
Gani adunay reported displaced families sa Cateel, Davao Oriental diin natala ang 27 ka pamilya/116 ka mga indibidwal.
Tungod usab sa landslide, dunay natala nga nadamyos nga balay sa Monkayo diin usa ang totally damaged samtang usa usab totally damaged sa Maragusan.
Sa karon, aron masiguro usab ang kaluwasan sa mga magtutudlo ug mga estudyante, gisuspinde na ang mga klase sa Monkayo, Compostela, Nabunturan, New Bataan ug Montevista.
RadyoMaN Renz Barbarona
