General Santos City— Upat ang patay samtang ubay-ubay ang naitalang samdan sa nahitabong engkwewntro tali sa tropa sa gobyerno ug teroristang New People’s Army kon NPA sa may Luwayon Detachment nga nahimutang sa Makilala, North Cotabato.
Sumala kang Lt. Lea Canseran, tigpamaba sa 39th Infantry Battalion nga alas 12 pasado ang takna sa kadlawan dihang miatake ang dili muubos sa 20 ka mga armadong kalakin-an sa maong detachment.
Milungtad ug halos duha ka oras ang pagbinayluay ug buto sa armas apan miatras ang mga nahisgutan human nga dili makaya ang pwersa sa gobyerno dala ang ilahang mga samdan nga kaubanan.
Dugang pamahayag ni Lt. Canseran nga tulo ang naitalang patay sa han-ay sa mga terorista kung asa nagpabilin sa kustudiya sa militar ang mga patay’ng lawas sa mga nahisgutan nga nagpabiling walay ilhanan.
Samtang giila niini ang namatay sa han-ay sa gobyerno nga usa Julito Apala, usa ka CAFGU, samtang adunay pito ang naiatalang samdan sa tropa sa gobyerno nga gilangkuban sa unom ka mga CAFGU ug usa ka sundalo.
Pamahayag niini nga ayha nahitabo ang engkwentro, una na matud pang gipasidan-an sa mga NPA ang mga residente sa ugar nga dili mnanggawas aron nga aduna silay mahimo nga mga human shield.
