Roxas City, Capiz – Nakilala na ang tatlo ka mga persona nga nakalusot kag nakasakay sa RORO vessel via Bacolod City kag nakadungka sa Dumangas Port apisar nga may yara sang ginapatuman nga border restriction.
Ini ang ginkumpirmar ni CPPO Provincial Director Col Julio Gustilo Jr matapos nga nakig-angut siya kay Dumangas Mayor Ronaldo Golez.
Suno kay Gustilo, ginkumpirmar sa iya sang alkalde nga may yara sang history of travel abroad(Egypt) ang nasambitan nga mga persona.
Ang mga ini ang natumod nga 51-anyos nga lalaki nga taga Brgy Bato, Panay; 40-anyos nga taga-banwa sang Ivisan kag 58-anyos nga lalaki nga taga- Roxas City. Ang mga ini ang lunsay mga seafarers kag ginakabig na subong nga mga Persons Under Monitoring (PUMs).
Sang ginpakig-angutan sang DYVR ang barangay kapitan sang isa ka barangay sa Ivisan, iya nga ginkumpirmar nga yara sa ila barangay ang amu nga persona kag ginapatuman na ang home quarantine sa 40-anyos.
Samtang ginmando naman sang provincial director sang Capiz PPO ang alerto kag pagbantay sa border control agud nga kun mag-attempt ang isa sa mga ini nga magsulod, mahatagan sa gilayon sang nagakaigo nga atensyon sang mga otoridad.
Nahibaluan nga matapos nga nakadungka sa Dumangas Port sakay sa Tri-Star Shipping, nagsakay ang mga ini sa traysikol padulong sa Zarraga, Iloilo kag wala na maabtan pa.
Ginpanugyan naman ni Gustilo sa nasambitan nga mga persona nga makig-angut sa mga health authorities agud nga mahatagan sila sang atensyon.
