Davao City – Nakabsan na sa kinabuhi ang igsuon sa unom ka bulan nga bata nga nasunog-patay sa Purok 9, San Miguel, Tagum City bandang alas 3:59 kagahapon sa hapon.
Kaganinang buntag, gikumpirma sa pamilyang Espinoza nga wala na ang usa ka tuig nila nga anak nga nakahiagom og 3rd degree burn.
Sa karon, duha ka anak nila ang gihaya sa covered court sa nasangpit nga barangay samtang ang duha ka anak nila nga daling na-rescue sa silingan anaa na sa luwas nga kahimtang.
Sa imbestigasyon sa Tagum PNP, milakaw matud pa ang amahan sa mga bata nga si Larry Espinoza aron mupalit og tambal apan naugdaw na ang ilang balay sa dihang mibalik siya.
Padayon pang ginasuta sa Bureau of Fire Protection-Tagum ang hinungdan sa sunog diin gituohang nagdula og posporo ang mga bata sulod sa ilang panimalay.
RadyoMaN Renz Barbarona
