Davao City – Gipamusil sa managlahing lugar sa riding in tandem ang usa ka konsehal ug usa ka dispatser alas-3:45 kagahapong adlawa, Nobyembre 13, nahitabo sa Purok 3, Brgy. Poblacion, New Corella, Davao del Norte.
Daling gisapupo paingon sa balay-tambalanan sa Tagum ang mga biktima nga naila nga sila si Alvin Libres, hamtong ang edad, minyo, incumbent Municipal Councilor sa New Corella, Davao del Norte ug usa ka Lito Labor, 55-anyos, minyo, usa ka dispatser ug residente sa maong lugar.
Sa inisyal nga imbestigasyon sa kapulisan, nasayran nga sa maong oras ug petsa gipusil tumong sa liog nga bahin si Libres samtang naglingkod sulod sa iyang sakyanan nga naka park atbang sa Virjams Hardware sa nasangpit nga lugar.
Samtang sa pipila ka gutlo lamang gipusil sab sa makaduha ka higayon si Labor sulod sa terminal 200-metros lamang ang gilay-ong gikan sa unang insidente samtang kini naglingkod aron magtala sa mga pasahero niadtong tungora.
Hinuon, luwas si Libres kinsa kasamtangang nagpaalim karon sa Tagum Doctors Hospital samtang gideklrang dead on arrival si Labor sulod sa Davao Regional Medical Center sa Tagum City.
Gisubay na sa SOCO team ang maong insidente diin narekober ang tulo ka gipabutong bala sa .45 nga pistola gikan sa crime scene samtang blanko sa gikahapon ang otoridad sa motibo sa suspek ingon man sa nagpaluyo niini.
RadyoMaN Jason Amisola
