General Santos City–Human ang pipila ka adlaw nga gisuwayan sa kasundalohan nga sakop sa 73rd Infantry Battalion Philippine Army nga inaug sa kabukiran ang patay nga lawas sa squad leader sa NPA nga si Mar-Mar Kawan, nga taga Malapatan, Sarangani Province nagmalapuson gyud sila nga mapahiluna ang lawas sa nasangpit kagahapong adlawa human pipila ka adlaw usab nga pagpangita sa kasundalohan ug landing site sa Sitio Lantubo, Barangay Culaman, Jose Abad Santos, Davao Occidental.
Sumala pa ni Capt. Frank Roldan Operation Officer sa 73rd IB nga gilayun nilang gidala ang lawas sa nasangpit sa Angel Funeral Homes sa may Alabel, Sarangani province kung asa nagpaabot ang mga kabanay niini.
Gibutyag pa ni Capt. Roldan nga si Marmar gikatakda na untang mamahimong Kumander sa ilang grupo gumikan nagbaton nag balatian ang ilang kasamtangang lider.
Sa kasamtangan usa matud pa kini ka squad leader ug siya usab ang political instructor sa Guerilla Front 71. (Dave Silagan)
