Davao City – Mugawas nga makalolo-oy ang gagmay nga mga nasud sa kalibutan sa giingong padayon nga trade war tali sa Amerika ug China karon.
Kini maoy opinyon giluwatan karon ni Davao City Second District Councilor Dante Apostol.
Sa walay kahumanan nga pagbingkil sa Amerika ug China karon, ang gagmay nga mga nasud maoy nagsapupo sa negatibong epekto sa dagan sa ekonomiya sama sa Pilipinas.
Ang lig-on nga basehan niini nga apektado gayud ang Pilipinas sa away sa Amerika ug China mao ang laing pagsaka sa inflation rate sa buwan sa Agosto kun pagmahal sa mga nag-unang palaliton karon.
Dili usab malilong pa ang kamatooran nga mitiyabaw na ang yanong lungsoranon karon gumikan sa pagsutoy sa presyo sa basic ug prime commodities.
Bisan og buot man mag-independiyente ug dili na magsalig sa patigayon sa Amerika ug China ang gagmay nga mga nasud apan walay gihapo’y kapasidad aron makabarog sa kaugalingon nga ekonomiya.
Sa tan-aw pa ni Apostol, sakto lang ang gibuhat ni Pres. Rodrigo Duterte nga gihigala ang tanang dagko ug gamhanang mga nasud sa kalibutan kay aron dili maipit pag-abot sa panahon.
RadyoMaN Joel Viray
