Davao City – Nibilin og mga damyos sa mga gambalay ang kusog nga linog nga nitay-og sa dakbayan sa Davao niadtong adlaw’ng Sabado.
Sa interbyu sa RMN Davao kang Rodrigo Bustillo, Ops and Warning Officer sa Davao City Disaster Risk and Reduction Management Council o CDRRMC, nga base sa ilang on going assessment adunay mga slighty damages sama sa mga nangaliki nga mga pader ug mga nangagubang kagamitan sa mga nagkadaiyang lugar sa syudad human sa magnitude 6.4 nga linog sa Manay, Davao Oriental.
Sumala ni Bustillo walay casualty apan usa ang natalang naangol human niambak sa ilang balay gumikan naratol na kini apan dali natambalan samtang na-rescue usab sa Central 911 ang lalaking giingong na-trap sulod sa elevator sa usa ka pribadong unibersidad.
Human sa linog wala na makasialob pa ang sunog sa second floor sa Abreeza Mall tungod usab dali kining natabang diin sumala ni Davao City Central Fire Station FO2 Marck Cahayag nga loose contact o short circuit usab ang hinungdan sa electrical fire.
Matud ni Bustillo wala nila giubos ang ilang alerto ug nagpadayon pa usab ang ilang assessment.
Panawagan niini sa tanan nga susihon ang mga istruktura kung aduna ba kiniy mga damyos ug pati ang mga kable sa kuryente.
Angay usab nga mag doble igmat ug andam sa kanunay ilabina dili matagna kung kanus-a muhapak ang kalamidad.
RadyoMaN Aimee Guinita
