Patay ang usa ka abogado human kini gipusil sa wala pa mailang mga suspek alas 6:50 kapin kon kulang kagahapon sa buntag diha sa Abello St. ning siyudad sa Malaybalay.
Sa interview sa RMN Malaybalay ngadto kang PLTCOL Jerry Tambis, ang hepe sa Malaybalay City Police Station gibutyag niini nga naila ang biktima nga si Atty. Winston Intong, 53 anyos lumulupyo sa mao nga lugar.
Nagpalit lang matud pa ug utanon ang biktima dihang gipusil kini sa 2 ka mga suspetsado sakay sa usa ka motorsiklo.
Matud ni Tambis nga naka-angkon ug lima ka samad pinusilan sa nagkadaiyang bahin sa lawas ang biktima.
Daling gidala sa hospital ang abogado apan gideklara kining dead on arrival.
Gidugang sa hepe nga adunay usa ka sibilyan ang napagan sa mao nga pagpamusil, diin naigo ang usa ka estudyante nga si Romeo Baliquig Jr. 19 anyos nga taga- Zone 6B, Brgy. 10 nga nagsilbing store attendant.
Personal nga panagbangi ang usa sa anggulo nga gitan-aw sa PNP-Malaybalay sa mao nga krimen apan gipadayon pa ang ilang imbestigasyon aron masayran kung aduna pay laing motibo.
Sa karon, wala pay person of interest o kaha suspek nga natumbok ang kapulisan sa pagpusil sa mao nga abogado.
Gi-review pa usab nila ang kuha sa CCTV camera sa mao nga panghitabo.
Gisiguro usab ni Col. Tambis sa publiko nga ilang gitutukan ang mao insidente sa pagpamusil aron masulbad ug maila ang mga suspek.
Alayon niini, hugot nga gikondina sa Integrated Bar of the Philippines kon IBP-Bukidnon Chapter ang mao nga panghitabo.
Sa gipagawas nga board resolution number 001-2021 sa IBP-Bukidnon gibutyag niini nga ang pag-atake batok sa usa ka miyembro sa bar usa usab ka pag-atake sa legal order ug justice system.
Nanawagan usab kini sa PNP ug uban pang law enforcement agancies nga muhimo ug dali, halawom, komprehensibo ug swift investigation aron makab-ot ang hustisya.
