* photo courtesy, Dr. Kathleen Joy Garingarao
“Libre nga tahi sa ilang high-grade nga personal protective equipment, sama sa hazmat suit o overalls alang sa mga doktor sa Iligan nga mi-atiman sa mga pasyente nga nataptan sa COVID-19 o kaha suspek nga aduna niini nga virus.”
Kini ang nahatag nga dakung tabang sa Tongas tailoring sa pagsugod pa lang sa pandemya sa Iligan, matud pa sa usa ka nephrologist o doktor sa kidney sa iyang post sa social media.
Miingon si Dr. Kathleen Joy Garingarao nga aminado sila nga sa pagsugod sa pandemya, dili sila andam, apan ang maong estbalisimento maoy usa sa labing unang naka-responde nilang mga doktor pinaagi sa pagtahi sa hazmat suit nga maoy mamahimong proteksiyon sa ilang kaugalingon.
Ang grupo nilang mga doktor, matud pa, maoy nangita og materyales nga base sa ilang research alang sa usa ka medical grade PPE ug ang Tongas tailoring maoy nagtahi nga libre, busa wala silay ginansiya sa maong trabaho.
Miingon si Garingarao nga iyang gihimo ang maong post aron ipahibalo sa publiko ang maong dakung tabang sa nasangpit nga establisimento, dili lamang ngadto kanila, apan lakip na ngadto sa kagamhanang lokal nga nalibre sa high-grade PPE alang sa mga doktor nga mitabang sa siyudad sa ilang COVID-19 response.
Kini nga tabang wala na-advertise o wala gipagawas sa Tongas ngadto sa publiko. (Divina M. Suson, August 26)
