Patay ang usa ka nailang membro sa Maute- ISIS terror group, human kini nakigpinusilay sa mga sakop sa 49th Infantry Battalion ,Philippine Army, alas 9:00 kapin sa buntag kagahapon, sa may Barangay Sawer, Masiu, Lanao del Sur.
Naila kini pinaagi sa nakuhang mga dokumento nga usa ka Zainal Candidato, kinsa nasayran nga maoy gihimong look-out sa dapit nga maoy gihimong hideout sa grupo, matud pa ni Major Ronald Suscano, ang Division Public Affairs Officer sa 1st Infantry Division, Philippine Army.
Nasayran nga i-raid unta sa tropa ang maong hideout human madawat ang taho sa mga residente nga dunay lima ka mga wala nila mailang lalaking armado kalit nga nagpuyo sa maong balay, usa ka semana pa lang ang nakalabay.
Nakapinusilay pa sa militar ang maong mga armado nga milungtad sa napulo ka minutos.
Naka -ikyas ang upat ka mga kauban apan napatay si Candidato ug nakuha sa maong hideout ang tulo ka mga M16 rifles, duha ka mga RPG Launchers, duha ka grenada, mga banner o flag nga dunay imprinta sa logo sa ISIS, unom ka mga sachet sa gituohang shabu ug uban pa’ng mga drug paraphernalias ug usa ka cellphone.
Walay gikatahong nasamdan o kaha namatay sa panig sa gobyerno. (Divina M . Suson)
