South Cotabato—Duha ang kompermadong patay samtang unom ang samdan sa nahitabong pagpanigbas sa sa usa ka pamilya didto sa Purok Pag-asa, Barangay Rizal, Bo.3, Banga, South Cotabato alas 6:30 ang takna sa gabie, Myerkules Hunyo 10, 2020.
Subay sa nahagpat nga report sa RMN DXMD Gensan giila sa kapulisan ang mga namatay nga mao silang Dismond Magno, 11-anyos ug Lenny Magno.
Samtang ang mga samdan ang giilang silang Edmundo Magno, Bobong Magno, Renante Magno, Zenny Ramos, Albert Ramos ug Moonlyn Bautista nga pulos mga residente sa nasampit nga lugar.
Giila usab karon sa Banga Police Station ang suspek nga si Paul Bautista, residente usab sa maong lugar. Subay sa inisyal nga impormasyon nga nahagpat sa DXMD-RMN Gensan, nga samtang anaa sa sulod sa ilahang panimalay ang mga biktima kalit lamang matud pang miabot ang suspek nga armado og hinagiban og gipanigbas ang mga biktima.
Damay usab sa mga nasamdan ang asawa mismo sa suspek nga si Moonlyn ingon man ang anak anak niini nga si Dismond kansa nakabsan kini sa iyahang kinabuhi gumikan sa pagpanigbas.
Nasayran nga magparyente lamang ang mga biktima ug ang suspek. Sa karon nagpadayon ang manhunt operation sa kapulisan sa Banga batok sa suspek kini human miikyas pagkahuman niya gihimo ang kremin.
