General Santos City—wala na nakaabot pang buhi sa ospital ang usa ka sundalo human kining gipusil sa wala pa mailhing mga suspek nga nakamotorsiklo alas 8:30 ang takna kaganinang buntag sa may Crossing palkan, Polomolok, South Cotabato.
Ang biktima giilang si Corporal Lemuel Gatinao, legal age, residenti sa Barangay Polonoling, Tupi, South Cotabato ug nakabase sa Compostela Valley.
Sumala ni Police Sr. Inspector Hernan Gabat, Hepe sa Polomolok Municipal Police Station nasuta nga gikan sa Gensan ang biktimang sundalo uban sa iyang misis ug pauli na unta sa ilang panimalay.
Didto miagi ang magtiayon sa may Barangay Koronadal Proper Polomolok Pag Abot sa Purok Bagras, sa samang Barangay sila gipusil sa duha ka lalaking nakamotorsiklo. Igo ang biktima sa iyang ulo, abaga ug uban pang parti sa lawas. Swerti usab nga wala maigo ang asawa sa biktima.
Paspas nga misibat ang mga suspek sa wala masayring lugar samtang ang asawa sa biktima nakapangayo ug tabang sa mga residenti. Daling gidala sa ospital ang sundalo apan gideklara kining dead on arrival gumikan sa mga samad niining naangkon.
Sa inisyal nga imbistigasyon sa mga imbistigador sa Polomolok PNP nasayran nga adunay kalaban ang nahisgutan ngadto sa ilang lugar sa Tupi ug usa kini karon sa mga anggulong gisubay sa otoridad bahin sa pagpatay sa biktima.
Sa kasamtangan padayon pa ang gihimong imbistigasyon ug padayon sa kaso. Nakig-alayon na usab ang kapulisan sa asawa sa biktima kansa nag inusarang testigo sa krimen.
