Davao City – Nadala sa balay tambalanan ang usa ka iyaan ug ang pagumangkon niini sa dihang gidunggab kini og kutsilyo sa usa ka suspek.
Sumala sa rekord sa San Pedro PNP, ang biktima mao sila si Arlene Alejandrino, 45 anyos nga taga Purok Bilusa Barangay 76-A ug si Al Francis Libay nga pag umangkon sa complainant samtang ang suspek naila nga si alyas Buting.
Sa sinugdanan nagsugod kining maong away sa panimalay sa complainant tungod sa problema sa pamilya.
Sa dihang nagsiyagitanay si Alejandrino ug Butig kalit nga migawas ang pagumangkon sa complainant ug nakig sumbagay ngadto sa suspek.
Mikuha og kutsilyo ang pag umangkon ni Alejandrino sa dihang napildi kini sa away.
Apan sa wala damha nailog ni Buting ang kutsilyo ngadto kaniya ug nadunggaban sa likod nga bahin ug nakahiagom og major injury samtang samdan sab sa siko nga bahin ang iyaan niini sa dihang iyang gitabangan ang iyang pag umangkon.
Naglusad na og dugang inbestigasyon ang kapulisan alang sa kaso nga ipasang-at ngadto sa suspetsado nga kasamtangang gi custodiya sa San Pedro PNP.
RadyoMaN Paul Canono
