General Santos City—Gikumperma ni Police Brig. General Alfred Corpus, PNP regional Director sa Police Regional Office-12 nga gawas sa tulo ka mga Junior Police Officer nga una nang gi-dismiss sa serbisyo gumikan sa paglambigit sa sabong, adunay laing usa pa ka Police Officer ang gidismiss usab sa serbisyo gumikan gihapon sa sabong.
Sumala ni Police Brig. Gen. Alfred Corpus nga ang maong Police Officer adunay ranggo nga Police Major. Wala hinuon gihinganlan sa opisyal kung si kinsa ang maong police ug kung asa kini na-assign.
Gihingusgan usab sa opisyal nga adunay katungod ang mga nasampit nga i-apila ang pagtanggal ngadto kanila.
Matud ni Brig. Gen. Corpus nga hugtanon ang kampanya sa higher headquarters sa PNP ug ni Pangulong Rodrigo Duterte batok mga Police nga malambigit sa unsa mang matang sa sugal apan aduna gyoy pipila nga nagasupak gihapon niini mao nga gihimo niya ang aksyon sa upat ka mga Police sa Region-12 nga nakighilambigit sa sabong.
Gihingusgan pa sa opisyal nga walay luna sa han-ay sa kapulisan ang mga pasaway nilang miyembro ug sama sa mga sibilyan, sila makadawat usab ug silot higayon mapamatud-an nga sila nakasala o nakahimo ug bayolasyon.
