Gilangkuban ang panagbangga sa usa ka Suzuki Multicab, nagtangag og plaka numero JAG-9535, gimanehu ni Ronald Naparan, hingkod ang pangidaron, ug residente sa Purok-4, Kimanait, Pangantucan, Bukidnon batok kini sa usa ka Honda CFT 125 single motor, nagtangag og temporaryong plaka 74282, gimanehu sa usa ka menor de edad, samtang ang backrider kinsa maoy namatay sa maong aksidente giilang si Leonida Emba, 68 anyos, minyo, ug mga reisdente sa Purok-7, Bangahan, Pangantucan, Bukidnon.
Sumala sa report sa kapulisan, nga gadagan sa susamang direksyon ang duruha nga nalambigit sa aksidente sa dihang pag-abot sa kurbadang bahin sa maong lugar, misuway og overtake ang naulahing motorsiklo ngadto sa nag-unang multicab apan sa wa damha, aduna kini nakatabo nga lain pang sakyanan hinungdan nga nawad-an kinig control sa gimanehu ug didto nasangit ang manebela niini sa walang bahin sa multicab nga miresulta sa pagkahagba sa mga sakay sa motor.
Nakahiagom og grabeng bun-og ug pangos sa kalawasan ang duha ka sakay sa motorsiklo ug daling gidala sa balay-tambalanan, apan nakabsan sa kinabuhi ang angkas niini.
Luwas ra usab ang kahimtang sa menor de edad nga drayber sa motorsiklo ug sa karon gapaayo na sa balay-tambalanan.
Temporaryo usab nga gidetenar sa Don Carlos Municipal Police Station ang drayber sa multicab alang sa tokmang disposasyon.
