Patay ang usa ka amahan samtang samaran ang anak niini human nga gipangtigbas kagabie sa Libona, Bukidnon.
Sa interview sa dxCC-RMN, gibutyag ni Police Lieutenant Edgar Villanueva, Deputy Chief of Police sa Libona Municipal Police Station nga nahitabo ang insedente alas 7:30 kagabei sa Purok 5, Sitio Layungon, Barangay Pungol, Libona, Bukidnon.
Naila ang mga biktima nga silang Eddy Baculio, 46 anyos, minyo, aktibong empleyado sa Department of Public Works and Highways kon D-P-W-H ug ang anak nga si Jason Baculio, 25 anyos, minyo, usa ka laborer.
Sa inisyal nga imbestigasyon, gikan sa bulangan ang mga biktima dihang gisumbag sa suspek nga si Teddy Labtan ang amahan sa likod nga bahin ug miuli.
Nasayran nga nasuko ang anak sa biktima ug gisundan ang suspek uban sa amahan apan gikasuko kini ni Labtan nga nagresulta sa pagtinigbasa.
Nasayran usab nga duna nay dalang hait nga hinagiban ang mag-amahan dihang misulong ngadto sa panimalay sa suspetsado.
Naangkon sa amahan ang samad tinigbasan sa ulo, likod ug liog nga bahin nga maoy hinungdan sa iyang kamatayon samtang ang anak nakaangkon usab og samad tinigbasan sa dughan ug pagkaputol sa wala nga kamot niini kinsa kasamtangang gitambalan sa Northern Mindanao Medical Center kon NMMC.
Samtang gitambalan usab sa N-M-M-C ang suspek sa pagpanigbas nga si Teddy Labtan.
Kini human nga makaangkon og samad tinigbasan sa likod nga bahin human nga makigtinigbasa sa mag-amahang biktima.
Matud ni Police Lieutenant Villanueva nga kasong homicide ang posibleng atubangon sa suspect.
