Gikustodiya karon sa Cogon Police Station ang usa ka inahan human nasikop atol sa buy bust operation niadtong Sabado sa hapon sa barangay Bulua ning syudad.
Ang suspect nailang si Hadji Umaya Sumagayan, 33 anyos ug taga Baloi, Lanao del Norte.
Sa interview sa dxCC-RMN kang Sumagayan, gibutyag niini nga nakuhaan siya og 25 gramos nga shabu nga nagkantidad og 50-mil pesos.
Gikumpirmar usab niini nga siya usa ka casual employee sa munisipyo sa Pantar, Lanao del Norte ug uban niya niadtong Sabado ang iyang nuybe anyos nga batang lalaki.
Matud ni Sumagayan nga wala siya masayod nga shabu ang gipadala kaniya gikan sa Baloi, Lanao del Norte ug ikaduhang higayon pa lamang niya nga mibisita sa Cagayan de Oro.
Samtang, gibutyag sa Cogon Police Station nga karong adlawa, pasakaan ang maong inahan sa kasong pagsupak sa Republic Act 9165 o Comprehensive Dangerous Drugs Act of 2002.
