Davao City – Gikumpirma sa Baguio PNP nga nag positibo sa Rapid Diagnostic Test (RDT) ang usa sa trese (13) ka mga sabongero nga nadakpan sa Purok 6 Barangay Gumalang, Baguio District, Davao City niadtong adlawng Domingo (Pebrero 14, 2021).
Sa interbyu sa DXDC RMN Davao kang Police Major Archilles Bargio, hepe sa Baguio PNP, gibutyag niini nga gilayong gi-isolate ang nagpositibo sa RDT nga taga Negros ingon man ang nahibiling nag negatibo apan karong adlawa (Pebrero 18, 2021) ipailawom ang 13 sa RT-PCR (reverse transcription-polymerase chain reaction) test nga maoy ginagamit sa syudad sa pag-detect sa Coronavirus Disease 2019 (COVID-19).
“Ang advise gyud sa amoa is isolate lang gyud then swabbing. Pero sa amoang part, naa pa man ‘mi nga RDT nga gamit, amoa nalang pud nga gamiton. Dili pud namo kumpyansahan kay gina-isolate man gyud namo hangtud nga dili pa ma-swab,” segun ni Bargio.
Matud ni Bargio, dakong problema kung adunay magpositibo sa COVID-19 pinaagi sa RT-PCR test diin kinahanglan i-contact trace ang anaa sa 50 ka tawo nga anaa atol sa sabong nga gilayong niikyas atol sa operasyon diin tulo ang namatay human nga niambak sa sapa ug nalumos.
Mag-atubang ang mga dinakpan og paglapas sa illegal gambling ingon man paglapas sa protocols batok COVID-19.
RadyoMaN Kirby Manzon
