Davao City – Samdan ang usa ka sundalo human napagan sa engkwentro sa Sitio Gurem, Barangay Sibulan, Sta Cruz, Davao del Sur kaganinang udto apan napugngan sa 10th Infantry Division Philippine Army ang planong pagpamintas sa CPP-NPA nga mga terorista sa 102nd Division Recon Company (DRC) ubos sa Operational Control sa 39th Infantry Battalion.
Sa report nga gipagula sa 10th ID, nagkaengkwentro kaganinang alas 12:12 sa udto ang kasundaluhan ug dili muubos sa 50 ka miyembro sa CPP-NPA Terrorists (CNTs).
Milungtad sa 45 ka minutos ang engkwentro ug daling misibat ang mga NPA sa habagatang-kasadpang bahin sa maong lugar.
Daling naghimo og clearing operation ang kasundaluhan ug nakarekober og usa ka Improvised Explosive Device kun IED, usa ka detonating cord, usa ka backpack nga dunay sulod nga mga subersibo nga mga dokumento.
Samtang ang samdan nga sundalo anaa na sa maayong condition gani wala pa nasuta og duna bay napagan sa pikas pundok.
Matud pa nga ang planong pagpanghasi sa nasangpit nga grupo subay sa ilang umaabot nga anibersaryo karong Marso 29.
Sa karon, hugot ang pagbantay sa kasundaluhan sa maong area aron usab masiguro nga luwas ang mga residente sa maong lugar.
RadyoMaN Renz Barbarona
