Davao City – Nisaad ang mga operators sa uso-uso jeep nga sundon na ang mga balaod trapiko dinhi sa syudad sa Davao.
Kini ang gibutyag ni Davao City Police Office kun DCPO-Traffic Group Chief Superintendent Ernesto Castillo atol sa interview sa DXDC 621 RMN Davao diin subay kini sa ilang gihimong panagpulong kaniadtong adlawng Sabado kauban ang Toril PNP ug mga operators sa uso-uso.
Gipasabot ni Castillo sa mga operators nga og kinsa man ang musupak sa mga balaod trapiko, automatic nga ila kining pandakpon.
Sumala sa hepe, plano usab karon sa mga operators nga tapukon ang mga drivers sa uso-uso sa Toril ug maghimo og panagpulong aron mapasabot sa mga drivers nga kinahanglan sundon ang mga balaod nga ginaimplementar sa kadalanan.
Sa karon, padayon nga ginapakusgan sa DCPO-Traffic Group ang ilang operasyon batok sa mga nagasupak sa balaod trapiko gani lauman nga karong semanaha maglusad na usab sila og laing operasyon sa pagpanakop sa malapsaon sa mga balaod trapiko aron sab madisiplina ang mga drivers.
RadyoMaN Renz Barbarona
