Utility Worker sa Bukidnon Provincial Hospital, nadakpan sa pagpayuhot sa illegal nga droga

Nadakpan sa gilusad nga implementasyon sa Search warrant sa pagpayuhot sa illegal nga droga ang usa ka Utility Worker sa Bukidnon Provincial Hospital pasado alas 8:18 sa buntag kagahapong adlawa didto sa Purok-4, Romagook, Kibawe, Bukidnon.

Gipangunahan sa mga personahe sa Kibawe Municipal Police Station ang maong operasyon inubanan sa ubang mga tinugyanan sa balaod nga miresulta sa pagkasikop ni Joseph Prejoles, 33 anyos, Utility Worker sa Bukidnon Provincial Hospital, ug residente sa naasoy nga lugar.

Narekober gikan sa posesyon sa suspek nga gikonsiderang Top 3 Provincial Target ug High Value Individual ang muabot sa 10 ka mga pakete sa gituohang drogang shabu nga mukantidad og P13,600 ug mutimbang og kapin kon kulang dos gramos.

Gikustodiya karon sa Kibawe Municipal Police Station ang suspek samtang giturn-over sa PNP Provincial Forensic Unit ang mga ebidensya alang sa dugang eksiminasyon.

Ginaandam na ang kasong paglapas sa RA 9165 o ang Comprehensive Dangerous Drugs Act of 2002 batok sa nadakpang suspetsado.