BACOLOD CITY – Patay ang utod ang ginatudlo bagman sang Berya Drug Group matapos ini gintiro sang mga suspek nga nakasakay sa isa ka Mitsubishi Adventure pasado las 12 kaina sang kaagahon sa Prk. Sampaguita 2, Brgy. Singcang Airport diri sa Bacolod City.
Ginkilala ang biktima nga si Wilmar Serenio, 31 yrs. old, manghod sang kontrobersiyal nga drug personality nga si Ricky.
Ginpahayag sang iloy sang biktima nga si Gina, nakabati sila sang anum ka sunod sunod nga lupok kag ulihi na sang ila nahibaluan nga si Wilmar na gali ang gintiro kag nag angkon sang madamo nga pilas sa nagkalain lain nga bahin sang iya lawas tuga sang pagtiro sa iya sang .45 calibre nga armas.
Ginbuyagyag sang iloy sang biktima nga nakabaton na gali sang pagpamahug ang iya anak halin sa nakilala lamang nga si Efren nga ginasiling asset sang Regional Special Operation Group.
Nagapati ang iloy sang mga Serenio nga ang pagpatay kay Wilmar ang may kahilabtanan sa pagbuyagyag ni Ricky sang mga pulis nga na involve sa drug money payola.
Angut sini, nagpahayag naman sang kaakig si Ricky kag naghangkat nga kuntani siya ang atubangon sang mga suspek bangud wala siya nahadlok sa mga ini kag indi na pag-idalahig ang iya pamilya. /dyHB BACOLOD
