Davao City – Sukad miigo ang 2019 coronavirus disease kun COVID-19 sa Davao Region daghan ang nahitabong kausaban sa dagan sa kinabuhi sa katawhan ug sa ekonomikanhong katikaran sa tibuok rehiyon.
Matud ni Davao De Oro Governor Jayvee Tyron Uy, sa iyang probinsiya makita ang dakung kalainan sa wala pa miabot ang COVID-19 pananglitan sa dagan sa seguridad ug kalihukan sa matag adlaw sa iyang katawhan.
Sumala ni Uy, tungod sa regionwide lockdown ug enhanced community quarantine may curfew hours ug liquor ban ug limitado na usab ang paggawas sa mga tawo ug daghan sa mga establisimiento nanirado nga nagpatay-og og maayo sa ekonomiya sa probinsiya.
Apan ang nindot lang nga dala ni COVID-19 mao nga dili lang nahimong disiplinado ug matinahuron sa balaud ang mga taga-Davao de Oro ug mainampuon na usab sila uban sa sa dakung pagtoo sa Diyos nga hingpit nang mahuman ang dala nga delubyo ni COVID-19 sa dili madugay.
Gumikan kang COVID-19, daghan sa mga pamilya ang subling nahiusa niining panahona kay daghan sa mga padre de pamilya ug sa mga ilaw ng tahanan ang nama-uli gikan sa mga trabaho nga nakabase sa lahi-lahing lugar sa rehiyon onse.
Tungod sa COVID-19, nakapahulay na ang kalibutan gikan sa kadaut nga mugna sa mga mga sakyanan nga nagabuga og toneladang carbon dioxide maingon sab ang binuhatan sa tawo.
Kumpiyansa ang amahan sa probinsiya sa Davao de Oro nga ginasunod sa iyang katawhan ang social distancing kun duha ka metros nga gilay-on sa matag usa ug ang mga reglamentos sa lockdown ug enhanced community quarantine sa tinguha nga masumpo ang pagkuyanap sa virus sa ilang dapit.
Walay problema kang Uy nga wad-on una ang pipila ka mga tradisyon sa mga Pilipino sama sa paghugoy-hugoy kun panagtapok ug uban pa aron sa ingon makalikay sa makatakod ug makamatay nga balatian nga miigo sa tibuok kalibutan karon.
Mas maayo tan-awon nga ehemplo ang Japan nga bisan og dato sila nga nasud apan ang ilang katawhan mituman sa kamanduan sa kagamhanan dinha sa mga gidiling angay buhaton diha sa pakigbatok sa COVID-19.
Gidasig sa maong opisyal ang tanan nga sugod karon anaron na ang mga kaugalingon sa mga mahitabong kausaban ug paghimugso sa bag-ong normalidad sa dagan sa kinabuhi inig bakwion na ang community quarantine ug mga lockdown nga gipasidaan ni Cabinet Secretary Karlo Norgrales ug Mayor Inday Sara Duterte-Carpio.
RadyoMaN Joel Viray
