Davao City – Dako ang pagtuo ni Compostela Valley (ComVal) Governor, Jayvee Tyron L. Uy nga makatabang og dako sa turismo sa probinsya ang pagsugod sa pag-operate sa public utility bus units sa Davao-Maragusan route sa pagpanguna sa Department of Transportation (DOTr) ug Land Transportation Franchising and Regulatory Board (LTFRB).
Sa interbyu sa DXDC RMN Davao kang Uy, gibutyag niini nga dugay na kining gipangayo sa taga Maragusan ug tungod niini mas mapadali na ang transportasyon sa nahisgutan labi na kadtong nanrabaho sa laing lugar.
“Maayo na kay mao pud nay ginapangayo sa mga tawo, sa taga Maragusan. Kay ang Maragusan man gud is a tourism and investment hub sa province. So, daghan na nga nanrabaho nga taga didto nga naa sa Tagum, sa Nabunturan. Daghan ang nalipay ana,” saysay ni Uy.
Nasayran nga adunay 10 ka mga bus units ang magsugod sa pag-operate sugod ugmang adlawa, July 11, 2019 ilawom sa Public Utility Vehicle Modernization Program (PUVMP) sa gobyerno.
RadyoMaN Kirby Manzon
