Davao City – Gipanghimakak karon ni Island Garden City of Samal (IGaCoS) Mayor Al David Uy nga usa ka pamilyahan ang pasahero sa sakyanan nga nahulog sa pantalan sa Brgy. Kinawitnon, Babak District, IGACOS, alas-8:30 kagabii.
Giklaro niini atol sa eksklusibong pakighinabi sa DXDC RMN Davao kaniya, nga si Fernando Pacaldo, residente sa Sitio Maag, Brgy. Peñaplata, Samal, ang maong sakay lang niadtong tungora taliwala sa mga migula nga balita nga sabay niini iyang pamilya.
Base sa inisyal nga imbestigasyon, naka-inum niadtong tungora ang biktima kinsa gikan mitambong og bunyag diin nasayran sab nga aduna kini gihambin nga balatiang high blood rason nga nagtoo ang otoridad nga nakatulog samtang naglinya kini sakay sa iyang Toyota Innova.
Gani suspetsa nila nga na- alimongawan ang biktima ug natamakan ang accelerator sa sakyanan diin midiretso kini sa kilid sa ferry diin atol sa pagkahulog niini napagan ang usa ka Narciso Kho, 29-anyos, taga-Cagayan De Oro City.
Saysay sa mayor nga nakagawas pa sa sakyanan ang maong biktima atol sa pagkahulog sa sakyanan apan duda niini nga gumikan sa kakusog sa bul-og sa tubig-dagat ingon man sa napormang linop ang rason sa pagkahapak niini ngadto sa sakyanan ug didto nawalaan og panimuot.
“From the area asa siya nahulog, napunit siya going siya sa block sa Samal more than 100-meters na,” tataw niini.
Dugang pa nga gisulayan og CPR sa mga divers ang maong biktima apan palta-swerte kining maluwas sa kamatayon ug gideklarang Dead on Arrival (DOA) sa IGACOS General Hospital alas-8:51 sa gabii.
Hinuon luwas ug nakahigaom lang og minor injury ang nadamay nga si Kho samtang gidala na ngadto sa tagtungod ang patay’ng lawas ni Pacaldo.
RadyoMaN Jason Amisola
