Uyoan gidunggab patay sa pag-umangkon human gidepensahan ang amahan

Davao City – Nanawagan ang kapulisan sa publiko nga dili magpalabi sa pag-inom aron malikayan ang mga insidente aron dili mosangput sa krimen, kini human nga napatay sa pag-umangkon ang iyang uyoan human niini gidensahan matud pa ang iyang amahan tungod sa kagubot nga nahitabo sa Purok 6-B, Barangay Magatos, Asuncion, Davao del Norte niadtong Sabado sa hapon, Enero 7, 2023.

Sa interbyu sa DXDC RMN Davao kang Police Chief Master Sergeant Joseph Borromeo, Asuncion Municipal Police Station (MPS) Investigator, gisaysay niini nga adunay salo-salo sa lugar ug nag-inom si alyas Raul, 48 anyos, amahan sa usa ka alayas Jamir, 22 anyos kauban usab ang uyoan niini nga si Rani, 48 anyos.

Tungod kay lango na sila sa ilimnon, nagbaton og lalis ug miabot sa punto nga gikulata sa uyoan ni Jamir ang iyang amahan.

Gidunggab sa batan-on ang uyoan gamit ang hinagiban nga naigo sa iyang tiyan, hinungdan sa iyang hinanaling kamatayon.

“Pagkahubog na nila, didto na nagsugod ang komosyon. Naay away-away ginagmay. Unya ang kadtong nadunggaban mao ‘toy nipalit daw sa kagubot didto. Niapil pud sya. Mao ‘toy nadunggaban,” saysay sa pulis.

Kagahapong adlawa, Enero 9, 2022, na-file na sa piskalya ang kasong homicide batok sa batan-on nga gibalhog na karon sa Asuncion MPS.

RadyoMaN Kirby Manzon