Sa interbyu sa DXDC RMN Davao kang Fire Officer 3 Anthony Claveria, chief investigator sa Mawab Fire Station, giila niini ang suspek nga si Marcelino Polic, 59 anyos.
Subay sa mga saksi, hubog ang suspek sa dihang nagkalalis kini sa iyang pag-umangkon ug asawa niini nga iya ra usab kauban sa balay alas 11 sa gabii niadtong Mayo 31, 2023. Gisulayan pa og dunggab sa suspek ang iyang pag-umangkon apan naunay kini og nasamdan sa nawong human kini gisipa agi’g depensa sa kaugalingon.
Pasado alas 2 sa kaadlawon, didto na miulbo ang kalayo sa dihang nihawa na usab ang mga complainant.
“Naa poy neighbor nga nakadungog nga sunugon niya (suspek) ang balay. Dayon, naay nakakita nga nagbibit daw siya og gasoline sulod sa botilya pero gina-work out pa namo na kung tinuod,” saysay sa imbestigador.
Nadakpan usab sa kapulisan ang suspek pagkabuntag didto sa balay sa iyang amo.
Gina-assess pa usab karon sa Mawab Fire Station ang kinatibuk-ang kantidad sa naugdaw nga balay.
RadyoMaN Kirby Manzon
