Davao City – Suportado sa usa ka human rights advocacy group ang panawagan ni Philippine Charity Sweepstakes Office (PCSO) Board of Director Sandra Cam nga ilusad ang imbestigasyon kalabot sa mga anomaliya sa maong ahensiya sa gobyerno.
Sa interbyu kang Volunteers Against Crime and Corruption (VACC) convenor Dante Jimenez sa programang ‘Straight to the Point’, gibutyag niini nga gikinahanglan ang pagsusi sa kamatuoran sa expose ni Cam kinsa usa usab ka ‘whistleblower’ sa kanhi rehimen.
Nagtoo si Jimenez nga inay mogasto’g dako sa engrandeng Christmas Party sa usaka five-star hotel sa kaulohan, mas maayong daghang ‘charity works’ ang buhaton sa PCSO isip usa ka charitable intitution haron matabangan ang mga labaw’ng nanginahanglan sa panabang sa gobyerno.
Segun ni Jimenez, angayan nga sundogon sa PCSO ang pagka-‘frugal’ kun simpleng pagkinabuhi ni Pres. Rodrigo Duterte isip usa ka role model sa tanang mga nangalagad sa kagamhanan.
Dakung uyon usab ang chairman sa VACC nga imbestigahan ang seroyosong alegasyon ni Cam nga 20% lamang sa kinitaan kun ‘proceeds’ sa Small Town Lottery (STL) sa entero nasud mopadulong sa panudlanan mientras ang balanse niini atua sa kamot sa mga gambling lords ug mga STL operators.
RadyoMaN Jason Amisola
