Dili kumbinsido si Volunteers Against Crime and Corruption (VACC) convenor Dante Jimenez nga tinud-anay ang pag-file sa Ombudsman ubos kang Conchita Carpio-Morales sa kasong ‘usurpation of authority’ ug ‘anti-graft’ kontra kang kanhi pamuno-nasud Benigno Simeon Aquino III sa kamatayon sa PNP Special Action Force (SAF) 44 kinsa napatay sa Mamasapano Maguindanao niadtong Enero 25, 2015.
Sa media interview, gibutyag ni Jimenez nga paingon na sila karon sa Supreme Court aron pangayoon sa labing hataas nga hukmanan nga magpagula ug preliminary injunction sa mga kiha nga gipasaka sa Ombudsman sa SAF 44 issue.
Adunay mga sektor nagtoo nga huyang kun haguka ang nasangpit nga complaint sanglit bailable ra kaayo kini ug dili tukma sa gibug-aton sa responsibilidad sa pangulo sa nasud sa kamatayon sa iyang mga sundalong gibahug niya ngadto sa Mamasapano.
Ang 44 ka mga special police operatives maoy gitahasan nga mo-execute sa ‘Oplan Exodus’ aron i-neutralisa ang foreign terrorist nga si Zulkifli bin-Hir alyas Marwan.
Si Marwan napatay sa mga awtoridad apan bug-at ang nahimong tugbang niini sanglit na-ula ang kinabuhi sa 44 ka mga batan-ong mga pulis kinsa na-corner sa usaka battle zone kun kamaisan ug gituhuang nahimong biktima sa tradisyong ‘pintakasi’ sa mga Moro rebels kinsa naghiusa aron alkontrahon ang pwersa sa gobyerno niadtong tungora.
Karong hapon, usaka media briefing ipahigayon sa VACC aron mas ipatin-aw pa ang ilang hiniusang aksyon ning nasangpit nga dugoong insidenteng padayong nagkudlit ug mapait nga memorya sa nasud ug katawhang Pilipinhon.
RadyoMan June Duterte
