Davao City – Subling gibigwasan karon ni Volunteers Against Crime and Corruption (VACC) convenor Dante Jimenez ang mga sektor nga nanawagan ug imbestigasyon sa kampanya kontra iligal nga droga sa nasud.
Sa interview sa morning radio social commentary program ‘Straight to the Point,’ gi-esplikar ni Jimenez nga may merito ang pagsuta sa proseso sa pagpanokhang sa mga drug suspects apan mas kritikal ang pagpalig-on sa judicial processes ug criminal justice system sa Pilipinas kun buot kita nga hingpit molampos sa anti-drug campaign.
Una niini, gitakda sa Senado ang pag-imbestigar sa kaso ni Kian Loyd delos Santos, 17 anyos nga Grade 11 pupil sa Caloocan kinsa napatay atol sa gituhuang drug raid sa maong lugar.
Gilaraw usab sa Commission on Human Rights nga suta-on pag-usab ang tanang gitawag nga mga ‘nanlaban’ cases kun mga insidenteng kamatay sa mga drug suspects kinsa gi-alegar nga nanukol sa mga awtoridad atol sa drug operations.
Matud ni Jimenez, mas maayong tutukan sa atong mga senador ug mga congressman ang paghikutar sa mas undanong mga regulasyones kontra droga sama sa pagpabanhaw sa death penalty ug ang paghinlo sa atong mga korte gikan sa korapsyon nga kawsa usab nga mabalda ang paspas nga pagtaral sa mga kaso sa droga.
Kahinumduman nga mismong si Pres. Rodrigo Duterte nipadayag sa iyang kadismaya sa dula sa pipila ka mga prosecutor o bisan mga huwes nga mo-apil sa hao-shiao sa droga pinaagi sa pag-areglo sa mga kaso pinaagi sa ‘plea bargaining’ sa mga higayun nga simpleng ‘illegal possession of drugs’ lamang ug dili drug trafficking ang kasong masang-at diha sa ilang mga sala.
Kasamang June Duterte
