Magaarangkada na ang vaccination sa mga Senior citizens gamit ang Sinovac vaccine sa masunod nga semana.
Ini matapos nga mabaton sang Department of Health-Center for Health Development Soccsksargen (DOH-CHD XII) ang 18,000 vials sang nasambit nga vaccine sang Miyerkules nga adlaw.
Ginpahayag ni Dr. Edvir Jane Montañer, DOH-CHD XII expanded program on immunization manager nga ang National COVID-19 Vaccination Operations Center ang nagpaggwa sang advisory sang Abril 7 nga ang Sinovac ang pwede na nga ihatag sa mga senior citizens ukon 60 –anyos pataas.
Nahibaluan nga sang una ang Sinovac ang ihatag lamang para sa mga 18 tubtob 59-anyos , apang base sa pagtuon sang mga eksperto ang CoronaVac ukon Sinovac ang pwede na nga ihatag sa mga senior citizens.
Ginhatagan pa punto ni Montañer nga ang Food and Drugs Administration ang nag-aproba sa paggamit sang CoronaVac Sinovac sa senior citizens basta seguraduhon lang ang health status kag exposure risk sang mga pasyenti lakip na ang screening sa vaccine recipients nga hypertensive.
Samtang gindeliver ang Sinovac vaccine sa mga health facilities sa rehiyon kahapon nga adlaw, Abril 15.
Suno kay Montañer magaumpisa ang pagbakuna regionwide sa priority A2 sa Lunes nga adlaw, April 19 tubtob 24 tungod yara na sa last phase ang priority A1 nga amo ang mga healthcare workers.
