Valencia City, ipailawom na sa GCQ sugod ugmang adlawa

Ipailawom na ang tibook siyudad sa Valencia sa General Community Quarantine sugod ugmang adlawa, Hunyo 9 hangtod 30 ning tuiga.

Kini human gi-aprubahan sa Provincial IATF ang Resolution No. 02, Series of 2021 nga nanghangyo sa pagbalhin sa quarantine classification sa syudad sa Valencia, mga lungsod sa Talakag, Kibawe ug Manolo Fortich gikan sa Modified General Community Quarantine (MGCQ) ngadto sa General Community Quarantine (GCQ).

Kini subay sa nagkataas nga kaso sa COVID-19 sa nahinganlang mga LGUs hinungdan sa hangyo niini nga ipataas ang ilang community quarantine status aron masangta ug mapaubsan ang gidaghanon sa positive cases sa COVID-19.


Kagahapong adlawa nagpagawas na ug Executive Order no. 152 series of 2021 si Valencia City Mayor Azucena Huervas isip giya ilawom sa GCQ.

Apil na dinhi ang pagpatuman sa total liquor ban, pagpatuman sa curfew nga magsugod alas 9 sa gabie hangtod alas 4 sa kadlawon, pagpatuman sa Alternative Work Arrangements ug ang subling pagpatuman sa clustering schedule.

Sa clustering schedule para sa 31 ka mga barangay sa mao nga dakbayan:

Cluster 1: Adlaw nga Lunes, Miyerkules, Huwebes ug Sabado ang mga barangay Banlag, Barobo, Lilingayon, Mt. Nebo, Maapag, Lumbayao, Tongan-tongan, Nabag-o, Bagontaas, Tugaya, Lurogan, Pinatilan, Vintar, San Carlos ug Poblacion. Cluster 2: Matag adlaw nga Martes, Miyerkules, Biyernes ug Dominggo mao ang mga Barangay sa Concepcion, Lourdes, Sinayawan, Sinabuagan, Mailag, Sugod, Laligan, Catumbalon, Batangan, San Isidro, Dagat –Kidavao, Lumbo, Guinoyuran, Colonia, Kahaponan ug Mabuhay. Samtang para sa mga lungsod ug siyudad sa Bukidnon mao kini ang clustering schedule. Cluster 1: Adlaw nga Lunes, Miyerkules, Huwebes ug Sabado mao ang Malaybalay, San Fernando, Cabanglasan, Lantapan, Sumilao, Impasug-ong, Talakag, Baungon, Libona, Manolo Fortich ug Malitbog. Cluster 2: Matag adlaw nga Martes, Miyerkules, Biyernes ug Dominggo mao ang Maramag, Quezon, Don Carlos, Kitaotao, Dangcagan, Kibawe, Damulog, Kadingilan, Pangatucan ug Kalilangan.

Facebook Comments